Komin heim til að fara aftur!

Við komum heim í gærkvöldi úr Vestfjarðarferðinni okkar. Ég get sagt það alveg heiðarlega að þetta er einhver besta ferð sem ég hef farið lengi. Vestfirðirnir eru einhver fallegasti staður á landinu (ásamt Borgarfirði, Hljóðaklettum og Mývatnssveitinni ). Það er ógleymanleg reynsla að keyra þessa vegi utan í klettum og þverhnípt niður í sjó, ég viðurkenni að stundum var ég farin að ofanda og komin með hjartsláttartruflanir en ég reyndi þó að bera mig vel og brosa í gegnum tárin.

Við gistum á Bíldudal, Ísafirði og Hólmavík. Við keyrðum út í Selárdal sem að er gjörsamlega ógleymanlegt. Það var heiðskírt og logn og hvítu strendurnar á leiðinni þangað út eftir voru eins og Spánarstrendur í sólinni. Við kíktum á Uppsali, heimili Gísla heitins og skoðuðum safnið hans Samúels. Ég gleymi þessu seint, það er alveg ljóst!

Við kíktum einnig á slóðir galdramanna á ströndum, en það er ótrúlega fróðleg saga að skoða, galdraöldin okkar íslenska, en ég hef alltaf haft einhvern undarlegan áhuga á þessum galdraofsóknum og skrifaði ritgerð um þær í deildinni og kom meðal annars inn á Jón Lærða en það hefði verið áhugaverður maður að hitta....!

Mér fannst Ísafjörður fallegur bær og við erum ákveðin að fara aftur á Vestfirðina og dvelja lengur næst því ekki náðist að skoða allt sem að við vildum og eigum t.d. eftir að fara á Rauðasand og út á Látrabjarg. En það er alltaf gott að eiga eitthvað eftir til að geta komið aftur !

En nú erum við rétt komin heim til að þvo og ganga frá.....því á morgun höldum við aftur út úr bænum á ættaróðalið í Skorradal og munum dvelja þar eitthvað fram í næstu viku.

Það er sannarlega mikið að gera þegar maður er í sumarfríi......!

Þangað til í næsta þvottastoppi.....verið hress, ekkert stress og bless!

Athugasemdir

[Hildur Inga Rúnarsdóttir (IP-tala skráð) 7.7.2007 kl. 02:38]

Oooooooo hvað ég öfunda þig að ferðast í þessu yndislega júlí há sumar veðri njóttu þess í botn.

Ég fer sjálf ekki í frí fyrr en 30 júlí en reyndar finnst mér haustið alltaf fallegt -þó var þetta ekki sjálf valið.

En að öðru við þurfum að fara að hittast Rómar hópurinn.

[Sunna Dóra Möller, 7.7.2007 kl. 11:53]

Jams það er gott að vera í fríi....og nú ætla ég í sveitina og svo mun leiðin liggja norður með því að keyra Austfirðina hahahaha......tökum allt landið fyrir núna, svo við getum farið róleg á sólarströnd næsta sumar !

Hafðu það gott í þínu fríi....ágúst er oft besti sumarmánuðurinn.....þú færð smá sól líka! Það væri bara alveg mikið sniðut að fara að hitta Rómarhópinn......skipuleggja það barasta !